listen to Thobela FM - Current Affairs
Thobela FM - Current Affairs
Pego:Komišene ya dikgetho (IEC) ka Northern Cape e lekotše lefelo la go voutela la ka Douglas pele ga tshepidišo ya go swara dikgetho ka leswa ka wardeng ya bo-3.
Party ya Siyancuma Independent Forum,e tla tšwela pele go ba gona letlakaleng la go vouta bakeng sa dikgetho tša ward ya bo-3 bekeng yeo e tlago ge kgorotsheko ya dikgetho e ka fana ka kahlolo yeo e fapanego.IEC e swareletše dipoelo tša dikgetho tša ka masepaleng woo morago ga gore matlakala a go vouta a 100 a sinywe nakong ya dithulano ka holong ya setšhaba ya Bongani ka Douglas bekeng ya go feta.Batho ba 11 go akaretšwa moetapele wa party ba swerwe le go lokollwa ka peila ya diranta tše 500 ka o tee.
Poledišano le mohlomi wa mokgahlo wa Mahlagonolo Thobile Founadation-Moshala Mothiba ka mosepelo wa bona wa ngwaga ka ngwaga wa go lemoša setšhaba ka masea ao a belegwago pele ga nako (premature babies) ka Mankweng ka Limpopo
Mahlagonolo Thobile Founadation e tla swara moseplelo wa boraro wa ngwaga ka ngwaga wa lesolo la temošo gosasa ka la 14 Nofemere ka tikologong ya Mankweng ka Limpopo.Morero-mogolo wa lesolo le ke go lemoša setšhaba ka dipelego tša pele ga nako le dihlohlo tšeo masea a go belegwa pele ga nako ba itemogelago tšona le malapa a bona.Mosepelo woo o bopa karolo ya kgwedi ya temošo ya masea a go belegwa pele ga nako ka Nofemere.
Pego:Mmago bana bao ba hlokagetšego kotsing ya mollo o kgitlile sello sa go hlomola le bao ba tsenetšego poloko dipelo ka Stella kgauswi le Vryburg ka North West.
Bana bao ba hlokagetše kotsing ya mollo ka mokhukhung wa gabo bona.Bobedi-Remotlotlo wa dikgwedi tse 5 le Tsetso Motsamai wa mengwaga ye 5 bo hlokagetše ka gare ga mollo ka motse-mošašaneng kgauswi le lekheišene la Rekgaratlhile.Bahlankedi ba thuša lapa leo le amilwego.
SADC e lebagane le ntwa ye mpsha kgahlanong le twatši ya HIV, bolwetši bja mafahla le malaria bjale ka ge dikete kete tša maphelo di le kotsing go sa šetswe kgatelo pele yeo e dirilwego mengwageng.
Se ebile molaetša kopanong ya ditona tša maphelo tša SADC le baetapele ba maphelo ba selete ka Durban. Ba re go hlokega ditshepediso tše maatla tša maphelo le tshomišano ya selete go fihlela ditlhotlo tše , ga mmogo le go phulega ga Ebola ka Democratic Republic of the Congo.
Poledišano Dr Bongani Nkosi re šeditše bohlatse bjo bo filwegogo ba go fihla ga bjale khomišeneng ya Madlanga go tloga mola ya thomološago bekeng.
Khomišene ya dinyakišišo ya Madlanga, e tšwelapele mesong ya lehono , fao go letetšwego gore hlatse ye mpsha e ya go fa bohlatse.
City Power ere e šoma bošego le mosegare go lokiša setiši sa mohlagase sa Mayfair seo se thuthupilego go buša kaabo ka Johannesburg le dikarolo tše dingwe.
Mmoleledi wa City Power Isaac Mangena ore ba šetše ka fela diperesente tše pedi go phetha ka mošomo wa ditokišo
Theeletšo ya beila ya rapolase wa Limpopo yoo a latofatšwago ka go betha batho ba babedi bao ba šwahletšego ka polaseng ya gagwe e tšwela pele lehono kgorongtsheko ya masetrata wa Mookgophong
Se go fa lephodisa la dinyakišišo sebaka sa go thala pego ya mabapi le tshedimošo ya molatofatšwa Hendrik Geyser.
Poledišano le mmoleledi wa kgoro ya maphelo ka Gauteng-Steve Mabona ka hlatlogo ya diphetetšo tša bolwetši bja letadi (Malaria).
Kgoro ya maphelo ka Gauteng e tšweleditše hlobaelo malebana le hlatlogo ya diphetetšo tša bolwetši bja letadi ke gore malaria le mahu ka probensing.Kgoro e re diphetetšo tšeo di kgonthišitšwego tše 768 le mahu a 17 di begilwe magareng ga kgwedi ya Jeneware le Setemere lenyaga.Le ge probensi ya Gauteng e sa itemogele bolwetši bja malaria ga kaalo,kgoro e re maeto a go tshela mellwane go etša go ya ka nageng ya Mozambique le dinaga tše dingwe tša SADC fao bolwetši bja malaria bo ikepetšego a ka beya maphelo a batho kotsing.
Pego:Badudi ba ka Mpumalanga ba wetšwe ke phišo ye kgolo ya go fihla go di-degrees celcius tše 30.
Ka ge phišo ya go fiša tšhiritšhiri e thomile go feta di-degree celcius tše 30 ka dikarolong tša go fapana tsa naga,probense ya Mpumalanga le yona e thomile go itemogela phišo ye kgolo.Badudi ba bangwe ba re phišo ye e gakatša seemo se boima seo ba bego ba šetše ba lebane le sona sa hlokego ya meetse.
Poledišano le raditaba wa SABC NEWS-Avhapfani Munyai ka tshepidišo ya kgorotsheko ya rapolasa wa ka Mookgopong ka Limpopo.
Rapolasa wa ka Mookgophong wa mengwa ye 50,Hendrik Geyser, o hlwele a tšweletše ka kgorong ya tsheko ya mastrata wa Mookgophong ka ditatofatšo tša go betha banna ba babedi ka maikemišetšo a go ba gobatša bao a rego ba šwahletse ka polaseng ya gagwe.O be a dira kgopelo ya peila fao e emišitšwego go fihla gosasa.Banna bao ba babedi ba batho baso ba be ba reya dihlapi ka polaseng yeo.
Pego:Party ya ANC e phaetše ka thoko dipolelo tša gore Presidente Cyril Ramaphosa o ithaopile goba go gapeletšwa go itokolla.
Party ya ANC e phaetše ka thoko dipolelo tša gore Presidente Cyril Ramaphosa o ithaopile goba go gapeletšwa go itokolla.Party e boletše se nakong ya kopano ya yona ka Boksburg ka bohlabela bja Johannesburg lehono.Baetapele-bagolo ba party ba tsenetše kopano yeo e katološitšwego ya go ikgetha ya khuduthamaga ya bosetšhaba ya party go ahla-ahla ka fao party e šomilego dikgethong tša mebasepala.
Theeletšo ya beila ya seopedi sa go tuma Shebe Maburna Chauke e tšwela pele letšatšing la lehono Labonekgorongtsheko ya masetrata wa Polokwane ka Limpopo.
Shebe Maburna o boditše kgorotsheko gore ditatofatšo tše masome pedi tee a lebanego natšo ga se tša swanela go mo thibela go ba le maloka a go fiwa beila
Modulasetulo wa SANCO ka Gauteng Abraham Mashishi ore City Power ga e nyake go kwa sello go tšwa go bona tabeng ya go šogana le bothata bja setiši sa mohlagase.
Modulasetulo wa SANCO ka Gauteng Abraham Mashishi ore ga se ba be karolo ya imbizo ya City Power le mmasepala mogolo wa Johannesburg maabane ka ge ba se ba laletšwa.
Kgoro tsheko ya masetrata wa Musina ka Limpopo e šutišitše molato kgahlanong le bašomi ba babedi ba rakgwebo wa North West Suliman Carrim go ba go fihla ka la masome pedi tharo Nofemere.
Bobedi bo golegilwe morago ga gore difatanaga tšeo ba bego ba sepela ka tšona di thibelwe mmolwaneng wa Beitbridge July
Khomišene ya bosetshaba ya badiriši e ipiletša go bušetswa morago ga difatanaga tša Cherry, Omoda le Volvo EX30 mabenkeleng a tšona ka mabaka a polokego.
National Consumer Commission NCC ka mmoleledi wa yona Pheto Ntaba ere ke difatanaga tše dikete tše masome-pedi tharo tša Cherry, Omoda le tše makgolo šupa tša Volvo EX30 le EX30 cross tšeo di swanetšeng go bušetšwa mabenkeleng a tšona di begilwego go ba di le nale mafokodi.
Poledišano le mmoleledi wa party ya Limpopo Independent Movement Alliance (LIMA)-Immanuel Tebogo Sejaphala yeo e hweditšego ditulo tše 5 tša go bopa karolo ya lekgotla la mebasepala #LGE26
Party ya Limpopo Independent Movement Alliance (LIMA) e hweditše ditulo tše hlano tša go bopa karolo ya lekgotla la mebasepala (PR Councillor seats) ka seleteng sa Mopani dikgethong tša mebasepala tša lenyaga.Ditulo tšeo ke tše tharo ka masepaleng wa selegae wa Greater Letaba,se tee ka masepaleng wa selegae wa Greater Tzaneen le se tee ka masepaleng wa selete wa Mopani.Party yeo e phinkgishaneditše dikgetho tšeo lekga la mathomo.Party e re e sa ikemišeditše go hlankela badudi ka seriti,boikgafo le botswerere.
Pego:Lapa la mootledi wa sekepe, yoo a timeletšego ka letamong la Hartbeespoort le ipileditše go mmušo go aba ditlabelwa tša tlaleletšo go maatlafatša lesolo la go nyakana le yena.
Jan "Obakeng" Mokonyane wa mengwaga ye 39 o timeletše nakong ya ge sekepe seo a bego a se otlela seo se bego se nameditše banamedi ba 9 se nwelela letamong leo ka la 25 kgweding ya Oktoboro.Go hlakodišitšwe batho ba 8 efela Mokonyane o sa timeletše gomme ba lapa ba sa letile.
Poledišano le mmoleledi wa federeišene ya bašomi ya SAFTU-Newton Masuku malebana le go ba kgahlanong le sephetho sa go hlatloša megolo ya maloko a kabinete ya mmušo.
Federeišene ya bašomi ya SAFTU, e kgahlanong le sephetho sa Presidente Cyril Ramaphosa go fa maloko a kabinete ya gagwe go akaretšwa yena hlatlošo ya megolo ya dipesente tše 3.5.Hlatlošo yeo e tla akaretša maloko a palamente gape le ditonakgolo tša diprobense go akaretšwa maloko a dikomiti khuduthamaga tša mmušo diprobenseng le malekgotlatheramolaong. Ramaphosa o tsebisitše seo maabane, morago ga ditshišinyo tša khomišene yeo e ikemego ya megolo ya bahlankedi ba ditirelo tša setšhaba, le godimo ga mathata ao ekonomi e lebaganego nao.
Pego:Mokgahlo wa go beya leihlo lekala la boahlodi wa Judges Matter,o amogetše hlatlošo ya megolo ya dipesente tše 4 ya baahlodi le bo-mastrata.
Mokgahlo wa go beya leihlo lekala la boahlodi wa Judges Matter,o amogetše hlatlošo ya megolo ya dipesente tše 4 ya baahlodi le bo-mastrata mola federeišene ya bašomi ya COSATU e sotše hlatlošo ya megolo ya dipesente tše 3.5 ya ditona le batlatši,maloko a palamente gammogo le makgotla-theramelao a diprobense le makgotla a mebasepala.Presidente Cyril Ramaphosa o tsebisitše seo maabane.
Molato wa molaodi wa dithoto wa mengwaga ye masome hlano tharo kantorong ya go šetšana le mafa kgorong tsheko ya godimo ya Polokwane Gustavus Moloto o šutišitšwe.
Molato o šutišitšwe go ba go fihla ka Mošupologo wa beke yeo e tlago ke kgorotsheko ya mastrata wa Polokwane, profenseng ya Limpopo.
Save video to ...
