listen to Umhlobo Wenene FM Current Affairs
Umhlobo Wenene FM Current Affairs
ZIBUZWAKUTHI - SAFA
Umbutho webhola ekhatywayo kweli iSAFA, uzakubamba inkomfa yonyulo eMidrand eGauteng ngomso. Babini abagqatswa abazakube begaqele isikhundla sokuba nguMongameli kulombutho. Oxhuzula imikhala njengoMongameli uDanny Jordaan, osele enguMongameli we SAFA ukusukela kweyoMsintsi ku 2013, ekwajonge esisikhundla isihlandlo sesine, uzakukhuphisana nosomashishini okwangumnini weqela lebhola ekhatywayo Amazulu, uSandile Zungu.
ZIBUZWAKUTHI - ANC
I-ANC ifake isicelo esingxamisekileyo kwinkundla yezonyulo ngelic'elumngeni isigqibo sekomishoni yonyulo ezimeleyo i-IEC, sokungamkeli uluhlu lwabagqatswa boomasipala abathandathu, emva kokuba lombutho usilele ukungenisa ngokusesikweni amagama ababagqatswa, phambi komda obubekiwe yile komishoni.
ZIBUZWAKUTHI - LUSIKISIKI
Umtyholwa wokuqala notyholwa ngoba ngungqondongqondo ekubulaweni kwabantu abalishumi elinesibhozo eNgobozana eLusikisiki, uMzukisi Ndamase, uyaqhuba nokuhlohla imibuzo umtyholwa wesine uBonga Hintsa, kwinkundla ephakamileyo eMthatha nechotshelwe eLusikisiki, eMpuma Koloni.
ZIBUZWAKUTHI - AD HOC ANA
Ikomiti yesikhawu epalamente iqinisekisile ukuba ibhalele usomlomo wendlu yowiso-mthetho uThoko Didiza, icela ukuba kwandiswe ixesha ukuze kungeniswe ingxelo yayo yokugqibela.
ZIBUZWAKUTHI - REFUGEES
Inkulubaphathiswa yephondo laKwaZulu Natal, uThami Ntuli, kunye nonozakuzaku welizwe laseDRC uJohn Kalunga Nyakeru, batyelela ii-ofisi zesebe lemicimbi yekhaya namhlanje. Oku kulandela iingxelo zokuhlala ngenkani kwamakhulu abemi bangaphandle, phandle kwezi ofisi benyanzelisa ukuncediswa ngamaphepha athile.
ZIBUZWAKUTHI - ADAMS
Uvele kwinkundla yenqila ePinetown KwaZulu-Natal inkokheli yeNational Coloured Congress nelungu lepalamente, uFadiel Adams. U-Adams wabanjwa eKapa kuCanzibe, ngokunxulumene netyala lorhwaphilizo nokuba ngumqobo endleleni yobulungisa. Kutyholwa ngelithi uAdams watyelela amabanjwa kwintolongo i-Westville e-Thekwini.
LAPHUMA - SAFA
Babini abazakube begaqele isikhundla sokuba nguMongameli wombutho webhola ekhatywayo eMzantsi Afrika (SAFA), xa kuza kube kubanjwe inkomfa yonyulo ngoMgqibelo, eMidrand, eGauteng. Oxhuzula imikhala njengoMongameli, uDanny Jordaan, osele enguMongameli we SAFA ukusukela kweyoMsintsi ku 2013, ekwajonge esisikhundla isihlandlo sesine, uzakukhuphisana nosomashishini okwangumnini weqela lebhola ekhatywayo Amazulu, uSandile Zungu. UZungu ujonge ukuzisa utshintsho kulombutho. Ingxelo ka Samantha Maries, iza no Nkosihleli Mfundisi...
LAPHUMA - AD HOC REPORT.mp3
Ikomiti yesikhawu epalamente neqwalasela inkxalabo yokhuseleko lwesizwe iphinde yacela ukwandiselwa ixesha kwakhona kusomlomo wendlu yowisomthetho, uThoko Didiza. Le komiti iphanda ngezityholo zongenelelo lezopolitiko, urhwaphilizo kwanongenelelo lwabophuli-mthetho kwinkqubo yezobulungisa. Le komiti yasekwa kwisithuba esingaphezulu konyaka. Amalungu epalamente akwinkqubo yokuqulunqa ingxelo yokuqala. Kokwesithandathu le komiti icela ukwandiselwa ixesha. Ingxelo kaZalene Merrington, iza noZandiswa Mkancu...
LAPHUMA - SA AGING
Uphando lwakutsha nje olwenziwe liziko i-The Bureau of Market Research, lwaphakathi enyakeni, lubonisa ukuba lehlile iqondo lokuzala eMzantsi Afrika. Oluphando lubonisa ukuba uninzi lwabemi beli ngabantu abadala xa kuthelekiswa nabantu abatsha. Kubemi beli abazizigidi ezingamashumi amathandathu anesihlanu, inani labantu abadala abaneminyaka engamashumi amathandathu anesihlanu ubudala, lenyuke ngomyinge wamashumi asibhozo ekhulwini kuleminyaka ilishumi elinesihlanu igqithileyo, logama lisehla inani labantwana. Ukanti oosoqoqosho balumkisa ngelithi ukwehla kweqondo lokuzala kubemi beli, kubeka uxinizelelo kuqoqosho nakwicandelo lemisebenzi. Ukushukuxa banzi lomba nokujonga ifuthe loku, emnxebeni sihleli nosoqoqosho uOwen Nkomo....
APHA - DABULA
Ibekwe kwikhaya layo lokugqibela iBishophu yamaWisile ebisidla umhlala phantsi, u Don Doran Dabula kwaBhaca, kwiphondo iMpuma Koloni. Urhulumente uyinike umngcwabo waseburhulumenteni okwinqanaba lesibini le Bishophu, ngelikhahlela kuyo ngendima eyenzileyo kwipolitiki nakwezenkolo. Izithethi ziyichaze le Bishophu njengendoda ebingacengi ndolalaphi ukunyevulela urhulumente wengcinezelo.
APHA - MERSETA
Igunyabantu leemveliso, ezobunjineli kwakunye nemiba yeenkonzo zemfundo noqeqesho, iManufacturing, Engineering and Related Services Sector Education and Training Authority (merSETA) ngamafuphi, libambisene neziko lecandelo lokuveliswa kwezithuthi eMpuma Koloni, Automotive Industry Development Centre Eastern Cape (AIDC-EC), liphehlelele iphulo lokuphuhliswa kwezakhono elixabisa izigidi ezihlanu neshumi elinesixhenxe zeerandi, eGqeberha. Eliphulo lijolise ekudaleni amathuba engqesho kubantu abatsha kweliphondo.
APHA - ITAC FEES
IKomishoni elawula urhwebo phakathi koMzantsi Afrika namazwe ehlabathi, i-International Trade Administration Commission (ITAC), yazisa ngemigaqo emitsha ezakuyivumela ukuba ihlawulise imali ethile ngeenkonzo ezinikezelayo. Ezinkonzo ziquka ukuqwalaselwa kwezicelo zokufumana iimpepha mvume zokungenisa nokuthumela ngaphandle impahla eveliswe kweli, kuquka izaphulelo kwirhafu yokurhwebelana, izatifiketi zokusebenza kwabo bakwicandelo lemveliso yezithuthi, nezinye iinkonzo eziphathelene nezorhwebo eziququzelelwa yile komishoni. Oku kuthetha ukuba i-ITAC izakuvumeleka ukuba ingawahlawulisi rhafu amanye amashishini afake isicelo xa kukho isizathu esivakalayo, okanye xa oko kusemdleni.
ZIBUZWAKUTHI - EC AMBULANCE REAX
Le ngxaki yokunqongophala kwezithuthi zezigulane, ichaphazela iphondo leMpuma Koloni lonke kuquka nasezilalini ngokunjalo nakwilokishi zeliphondo. Iingxelo zithi zimbini kuphela ii-ambulensi kwezintlanu ezinikezelwe kwisibhedlele saseHumansdorp, ezisebenzayo sithetha nje.
ZIBUZWAKUTHI - EC AMBULANCE
Abahlali ingakumbi kwimimandla yasezilalini eMpuma Koloni, bakhalaza ngokunqongophala kwezithuthi ezihambisa abantu abagulayo kunye neenkonzo zonyango ezingathembekanga kwizigulane. Bakhalaza ngelithi, ezinqwelo zezigulane azifiki ngexesha kwindawo yengozi kwaye ngamanye amaxesha kuye kufuneke bahlawule imali yokuqesha isithuthi ukuze kuleqiswe izigulane kwizibhedlele zikarhulumente.
ZIBUZWAKUTHI - BOOT CAMP
Isebe lophuhliso loluntu eMpuma Koloni, liqinisekisile ukuba iziko lokwaluleka izimilo, i-Discipline Bootcamp SA, alibhaliswanga phantsi kwesebe njengeziko lokwaluleka.
ZIBUZWAKUTHI - REFUGEES
Umbutho iMarch and March ubambe umngcelele eThekwini kwiphondo iKwaZulu Natal, ukhalazela abemi bangaphandle abahleli ngenkani ngaphandle kwee ofisi zesebe lemicimbi yekhaya. Amagqwetha alo mbutho akhuphe imbalelwano enyanzelisa ukususwa kwababantu babuyiselwe kumazwe abo.
LAPHUMA - EC CRIME
Amapolisa kwiphondo iMpuma Koloni, achaze ukwehla kwamatyala anobundlobongela ngakubantu, ngomyinge we 2-point-6 wee-pesenti kwikota yokuqala yonyakamali ka-2026/2027. La matyala ehle ukusuka ngaphaya kweshumi elinesihlanu lamawaka (15000) kwikota yokuqala yonyakamali u-2025/2026, ukuya ngaphaya kweshumi elinesine lamawaka (14000) ekupheleni kwekota ephela ngeyeSilimela kulo nyaka.
LAPHUMA - IMPEACHMENT PARLY
Ikomiti yasePalamente ejongene nenkqubo yokuguzulwa esikhundleni kukamongameli kwinyewe engengxelo yegqiza likaSection89, ivote ngelichaseneyo nezicelo ezibini ezifakwe kwinkundla ephakamileyo yephondo iNtshona Koloni, ngumbutho iEconomic Freedom Fighters ne African Legal Professionals Association.
LAPHUMA - CODE FOR ETHICAL LEADERSHIP
Sithetha nomphathiswa wesebe loorhulumente basekhaya, uVelenkosini Hlabisa, ngokuzibophelela koomasipala abalikhulu kulawulo olusekelwe kwimigaqo yokuziphatha...
ZIBUZWAKUTHI - IFP KILLING
Umbutho iNkatha Freedom Party, uqinisekise ukuba kubulewe omnye uceba wabo eMsinga, kumbindi wephondo iKwaZulu-Natal. UJames Mabaso, ebekuluhlu labagqatswa balombutho kunyulo oluzayo loorhulumente basekhaya. Lo ngumgqatswa wesithathu weIFP obulewe kweli phondo kule nyanga yoMsintsi. Kwiveki ephelileyo, abagqatswa ababini beewadi kumasipala waseMshwathi naseMlalazi, badutyulwe babulawa kwiziganeko ezahlukileyo.
Save video to ...
