RSG Nuus en Aktualiteit
Die wiele aan die rol vir twee nuwe Kernkragaanlegte in Suid Afrika.
Eskom het 'n omgewingsimpakstudie gelas vir die beplande oprigting van 'n derde kernkragsentrale. Dié kragstasie sal of by Thyspunt aan die Ooskus van die Oos-Kaap opgerig word, of by Bantamsklip in die Wes-Kaap. Die kragvoorsiener het reeds vier maande gelede, die finale omgewingsgoedkeuring ontvang om die tweede kernkragsentrale op Duynefontein op te rig, wat naby Koeberg geleë is. Ons het op Monitor met die joernalis Antoinette Slabbert daaroor gepraat.
'n Krisis met skoolplasings en die LUR se dis jou skuld as ouer.
Ouers van meer as elf-duisend voornemende graad een en agt leerlinge het nog nie aanbiedinge vir plasing in Gautengse skole aanvaar nie. Die provinsiale LUR vir onderwys, Matome Chiloane, sê meer as 400-duisend aansoeke is vir die 2026 skooljaar ontvang, waarvan meer 40-duisend leerlinge nog in 'n skool geplaas moet word. Hy moedig ouers aan om die plasings teen volgende Vrydag, te aanvaar. Hy se verder die probleem is deels ouers se skuld. Die Hoof van Onderwysprojekte by Afriforum, Carien Bloem het aan Monitor verduidelik hoe diep die krisis is en of ouers wel verandwoordelikheid dra daarvoor
'n Tweede verdagte vasgetrek na Baltimore Plaasmoord.
'n 28-jarige man het gister in verband met Saterdag se plaasmoord in die Baltimore-omgewing in Limpopo in die hof verskyn. Die tweede verdagte in die saak is vroeg Donderdag oggend vasgetrek. 'n Boer, die 77-jarige Attie Mahne is tydens die voorval vermoor. Die verdagte, Hendrik Chimole, is na 'n intensiewe ondersoek Dinsdag deur lede van die Provinsiale Moord- en Roofeenheid, speurders van Tolwe, en die Bosveldmisdaadondersoeke en Bosveldplaasbeveiliging sekuriteitsmaatskappye in hegtenis geneem. Ons het op Monitor gepraat met 'n voormalige polisiespeurder, Sakkie Louwrens, van Bosveldmisdaadondersoeke.
Freek Burger: 'n Ses-week skorsing sal gepas wees vir Etsebeth
Die voormalige internasionale skeidsregter, Freek Burger het vanoggend op Monitor sy gevoel uitgespreek oor wat die Bok-slot Eben Etsebeth se straf moet wees na Saterdag se rooikaart teen Wallis. Hy het Dinsdagaand voor n wereldrugby tugkommittee verskyn nadat hy sy vinger in die oog van die Walliese flank, Alex Mann gedruk het. Die oortreding kan n maksimum skorsing van 4 jaar dra indien dit doelbewus en roekeloos was. Burger voel wel dat daar versagtende omstandighede is en hy is ook ’n bietjie keelvol oor hoe die Bokke deur die media uitgesonder word in hulle ontleding van ons spelers se dissiplinêre kwessies.
“Rampaphosa is hier om te bly”, sê ‘n ANC minister.
Die ANC het in 'n verklaring hewig te velde getrek teen 'n berig in Sunday World, wat 'n beweer dat daar ’n verdeelde leierskap binne die party is, met komplotte om die president te verwyder. Die ANC het die artikel ten sterkste verwerp, wat die party as ongegrond en sensasionalisties beskou. Alvin Bothes , lid van die ANC se nasionale uitvoerende komitee en ANC NUK-lid en kabinetslid, het op Monitor oor die komende vergadering van die Nasionale Algemene Raad van die ANC gepraat. Ons het ook ‘n ontleding van professor Piet Croucamp gekry oor wat ons volgende week te wagte kan wees.
Pres. Ramaphosa se toespraak Sondagaand het min beïndruk...
Die burgerregteorganisasie AfriForum sê president Cyril Ramaphosa en ander ANC-leiers se roekelose optrede en beleidsrigtings is direk verantwoordelik vir Suid-Afrika se verswakkende verhouding met die VSA. Volgens AfriForum het Ramaphosa tydens sy toespraak gisteraand gepoog om die verantwoordelikheid vir die negatiewe gevolge van sy eie optrede te ontduik deur die diplomatieke krisis met die VSA valslik voor te hou, as die gevolg van sogenaamde waninligting wat versprei word deur groeperings in Suid-Afrika. Die uitvoerende hoof van AfriForum, Kallie Kriel, sê die president moet eerder voor sy eie deur vee voor hy ongegronde beskuldigings maak.
Hoe bou 'n mens Samehorigheid in 'n land met 12 amptelike tale?
Soos die land die toekoms in beweeg is daar al hoe meer 'n gevoel van Suid-Afrikaans-wees wat bo ons onderskeie demografieë uitstyg. So is ons byvoorbeeld nou in staat om almal saam die Springbokke en ander sportspanne se ongelooflike prestasies te vier en so was ons ook in staat om in Augustus 'n nasionale dialoog bekend te stel om kwelpunte in ons samelewing te probeer uitstryk. Maar daar is een groot struikelblok: ons praat nie almal dieselfde taal nie, en kommunikasie is soms moeilik. Dit is een van die redes hoekom iPendoring se jaarlikse Inheemse Taal Imbizo, gehou word, om maniere te vind hoe ons oor die brue kan afbreek. Ons het op Monitor met Eben Keun, die bestuurder van iPendoring gepraat.
Hou ten minste op om "Kill the Boer" te sing, vra Baltimore boere na gru-moord.
‘n Egpaar van Baltimore in Limpopo is die afgelope naweek op hulle plaas deur twee mans in klapmusse aangeval. Die 77-jarige At Mahne is dood, en sy 74-jarige vrou Pietro is beseer. Besonderhede oor die aanval is nog nie bekend nie, maar na bewering is Pietro Saterdagmiddag omstreeks vier-uur oorval en vasgebind, terwyl At na sy beeste gaan kyk het. At is wreed aangerand na hy by die huis aangekom het, en het tydens die aanval, of kort daarna, gesterf. Henk Malan, ‘n lid van die Baltimore Boerevereniging en ook ‘n boer in die omgewing, vra dat die regering, as ‘n begin, 'n einde bring aan die sing van die anti-Apartheidstryd liedjie, "Kill the Boer".
Waninligting en Demokrasie: 'n bitter tweestryd
Watter rol speel waninligting in ons Demokrasie? Nie net hier in Suid Afrika nie maar ook wereldwyd. Dit was die tema by die onlangse Globale ondersoekende Joernalistiek konferensie wat in Maleisië gehou is. Van Suid Afrika se voorste ondersoekende joernaliste het ook hierdie konferensie bygewoon Die skrywer, en assistent redakteur vir ondersoekende joernalistiek by news24 Pieter Du Toit was ook daar. Ons het op Monitor met hom en Professor Piet Croucamp gepraat oor die impak wat hulle hiervan sien in Suid Afrika.
LUISTER, voor jy die Swart Vrydag-strate invaar
Vir miljoene Suid-Afrikaners het Swart Vrydag uiteindelik aangebreek en vir miljoene meer beteken Swart Vrydag net mooi niks, want hulle het nie geld nie. Dis 'n warrelwind van aanbiedinge, groot afslae, en die sielkundige druk om te koop. Dawie Roodt, die Hoof Ekonoom van die Efficient Groep, deel op Monitor sy wenke om die dag en naweek te oorleef.
Afleggings gaan lei tot 'n droewige kersfees.
Solidariteit voorspel 'n droewige Kersfees vanweë die aantal afleggings wat hy te wagte is. Dit sluit Artikel 189-afleggings in. Dít kom nadat die vakbond 'n geskil met die regering by NEDLAC verklaar het oor die vlaag van afleggings wat in aantog is, en wat hulle die gebrek aan politieke wil noem, om die situasie te stuit. Dié week was daar bemiddeling met die regering en werkgewers oor werksverliese by NEDLAC. Monitor het met die hoofsekretaris van Solidariteit, Gideon du Plessis hieroor gepraat.
Aanlyn-Dobbel: 'n Bonus vir Jan Taksman
Die Nasionale Tesourie het Dinsdag 'n besprekingsdokument gepubliseer waarin daar voorgestel word dat 20 persent belasting gehef word op geld wat op aanlyn-dobbelplatforms gewen word. Die rede hiervoor, so word daar in die inleiding van die dokument aangevoer, is omdat dobbelary, met meer as 30 persent in die laaste boekjaar toegeneem het. Die tesourie vrees dat dobbelary as 'n verslawing toeneem veral weens die aanlyn-dobbelplatforms. Charles de Wet, 'n belastingvennoot by ENSAfrica verduidelik hoe so n wet sal werk en hoeveel geld dit by ons koffers sal voeg.
En nou wag SA vir Trump se reaksie na die oorhandiging van die G20-leisels
Suid-Afrika het gister die G20-presidentskap aan die VSA in Pretoria oorhandig. Die oorhandiging by die kantore van die Departement van Internasionale Betrekkinge en Samewerking - of DIRCO - was egter nie 'n prominente media-geleentheid nie. Die afgelope naweek is die G20-leiers se verklaring deur wêreldleiers in die afwesigheid van die VSA aanvaar na hulle boikot van die beraad. Die Minister van Internasionale Betrekkinge en Samewerking, Ronald Lamola, het toe beklemtoon, en daarop aangedring, dat behoorlike diplomatieke protokol gevolg moet word, wat 'n oorhandiging tussen amptenare van vergelykbare rang vereis. Monitor het die mening van Dr. Oscar van Heerden, 'n senior navorser by die Sentrum vir Afrika Diplomasie en Leierskap aan die Universiteit van Johannesburg ingewin.
Die Tesourie see “Nee” vir Nama Khoi-munisipalitiet se 15 jaar kontrak met diensverskaffer
Die Nama khoi-munisipaliteit in die Noord-Kaap - wat dorpe soos Springbok, Kleinsee, Steinkopf en Vioolsdrif insluit - sit met sy hande in die hare, omdat die Nasionale Tesourie daarop aandring dat hy nie sy kontrak met die maatskappy Rural Maintanance hernu nie, Dit is ondanks 'n noemenswaardige verbetering in die munisipaliteit se geldsake. Rural Maintenance het na bewering reeds sowat R50 miljoen bestee om onder meer infrastruktuur in dié munisipaliteit te herstel, en wil nou die saak hof toe vat. Monitor het met die Speaker van die Nama Khoi- Munisipaliteit, Dr. Gustav Bock gepraat.
Die Konstitusionele Hof sal besluit of die MRK-aanbevelings afdwingbaar is
Die Konstitusionele Hof sal die Suid-Afrikaanse Menseregtekommissie se appèl teen ‘n Appèlhof-uitspraak van Augustus 2024 aanhoor. Die uitspraak het bevestig dat die aanbevelings van die kommissie NIE bindend is nie, en slegs deur 'n hof afgedwing kan word. Hierdie uitspraak volg op 'n geskil tussen die Kommissie oor die reg op toegang tot water. Avokaat Anna-Marie de Vos wat spesialiseer in grondwetlike litigasie, veruidelik aan Monitor wat die kanse van sukses is voor die hoogste hof in die land.
Nog niks is gedoen om die MK Party “huursoldate” terug te bring uit Rusland nie
'n Familielid van een van die 17 Suid-Afrikaners wat hulle in Oekraïne in die oorlogsone bevind, sê die regering het nog niks gedoen om hulle terug te bring Suid-Afrika toe nie. Oud-president Jacob Zuma se dogter, Nkosazana Bonganini Zuma-Mncube, het gister 'n strafsaak teen haar suster, Duduzile Zuma-Sambudla, sowel as Siphokazi Xuma en Blessing Khoza, by die polisie in verband met die saak aanhangig gemaak. Ons hoor op Monitor by 'n parlementslid of die wetgewer die regering sal dwing om op te tree en by n regskenner oor die straf wat 'n skuldigbevinding dra. Ons vind verder uit of die geval voldoen aan 'n moontlike saak van mensehandel en die onwettige werwing van huursoldate.
Wat gaan aan by die DA?
Die openbare bekgeveg tussen die Minister van Landbou en leier van die DA, John Steenhuisen en die federale voorsitter van die DA se geldsake, Dion George, word op die spits gedryf. George is onlangs as Minister van Bosbou, Visserye en die Omgewing, deur die artywoordvoerder, Willie Aucamp, vervang. Die DA sê hy kan nie teen enige van die partye optree nie, omdat geen klagtes ingedien is nie. Ons praat hieroor met die politieke ontleder, Professor Theo Venter van die Noordwes-universiteit.
G-20 was n sukses maar........
Met of sonder die betrokkenheid van die VSA is 'n G20-leiersverklaring hierdie naweek aanvaar En nou wag ons om te sien hoe die Amerikaanse president Donald Trump sal reageer op ‘n beraad wat hy geboikot het en vir fyner besonderhede oor hoe die oorhanding aan Amerika as volgende gasheer land van die G20-beraad op diplomatieke vlak sal uitspeel. President Ramaphosa het geweier om die oorhandiging te doen aan n ampsdraer wat nie die status van n senior leier van Amerika dra nie. Pieter Duvenage, 'n politieke kommentator verbonde aan die Hugenote Kollege deel op Monitor sy verwagtinge.
Afrikaanse rolspelers poog om met, en nie oor mekaar te praat nie.
Die Kaapse Forum het verskeie rolspelers uit Afrikaanssprekende gemeenskappe genooi om die afgelope naweek aan 'n oop gesprek oor verskeie geskilpunte deel te neem. Dit gesprek het in Stellenbosch plaasgevind. Die openbare geskil tussen Solidariteit en die 'Nie in Ons Naam”-veldtog oor President Donald Trump se aanbod van vlugtelinge status aan wit Suid Afrikaners, was een van die kwessie waarop die gesprekke gefokus het. Ons het op Monitor met die operasionele hoof van Solidariteit, Werner Human, en met die Sosiologie Professor Christi Van der Westhuizen hieroor gepraat.
G20 nuus wat jy moet weet
Verskeie paaie by die OR Tambo Lughawe asook in en om Johannesburg, gaan die week gesluit wees weens die G20 beraad, wat by Nasrec plaasvind.Die metro polisie vertel wat gaan gebeur ..
Save video to ...
